nanpa luka luka tu wan

jan lawa lili li tawa e sike pi nanpa tu tu. sike ni li jo e jan mani. ona li pali li lukin ala e jan lawa lili.

jan lawa lili li toki: “toki! kasi moli pi uta sina li seli ala.”

“wan en wan li tu. tu en wan li tu wan. toki. tu wan en wan li tu tu. mi jo ala e tenpo tawa ni: mi seli e kasi moli mi. tu tu en wan li luka. luka en wan li luka wan a!. ni li wan tu luka mute ale.”

“ni li wan tu luka mute ale pi seme?”

“a?! sina lon ma ni anu seme? mi sona ala. mi jo e pali mute! mi jan suli li jo ala e tenpo tawa ni: mi toki musi. luka wan en wan li…”

“ni li wan tu luka mute ale pi seme?” ona li wile kama sona la ona li toki.

jan mani li sewi e lawa. “tenpo pi tu wan la mi awen e pali mi. tenpo wan la pipi li anpa. ona li kalama ike mute. mi pali ike tan ni! tenpo tu la mi pilin ike lili. tenpo tu wan li tenpo ni! mi toki: ni li wan tu luka mute…”

“…ale pi seme?”

jan mani li sona e ni: ona wile pali la ona wile toki e jan lawa lili! “…pi ijo lili lon sewi.”

“ni li pipi anu seme?”

“ala. ni li ijo lili seli.”

“ni li pipi seli anu seme?”

“ala! ala! ala! ni li ijo li pali e ni: jan awen li lukin e ona. taso, mi jan suli li jan awen ala!”

“a! ni li sike seli sewi!”

“lon.”

“sina pali e seme tan ona mute?”

“mi jan nanpa! sina wile toki e ni: wan tu luka mute ale.

“sina pali e seme tan ona?”

“mi pali ala. mi jo e ona.”

“sina jo e sike seli sewi anu seme?”

“jo.”

“tenpo pi weka lili la mi lukin e jan lawa suli. ona li...”

“...jan lawa suli li jo ala. ona li wawa. ‘wawa’ en ‘jo’ li ante suli.”

“sina jo e ona tawa seme?”

“mi jan pi mani mute.”

“sina jo e mani mute tawa seme?”

“mi ken jo e sike mute.”

jan lawa lili li pilin: “ona li toki sama e jan pi telo nasa!”

“sina kama jo e ona kepeken nasin seme?”

“jan seme li jo e ona?”

“mi sona ala. ala li jo e ona!”

“lon. mi jo e ona tan ni: mi taso pilin e ni: mi jo e ona.”

“a! ni li pona mute anu seme?”

“pona mute. sina pana e kiwen pi jo ala la sina kama jo e ona. sina tawa e ma pi jo ala la sina kama jo e ona. sina sitelen e pilin pi jo ala la sina jo e pilin ni. mi nanpa e sike pi jo ala la mi kama jo e ona.”

“sina jo e ona. sina pali e seme kepeken ona?”

“mi nanpa e ona. ni li pali suli.”

jan lawa lili li ante: “mi jo e len la mi ken len e ona. mi jo e kasi loje la mi ken pilin e ona. sina ken ala pilin e sike seli!”

“ken ala. mi ken pana e ona tawa tomo mani!”

“ni li seme?”

“mi sitelen e nanpa pi sike mi lon lipu. mi pana e lipu lon poki.”

“taso?”

“taso.”

“ni li musi li pona. taso, ni li suli ala.” jan lawa lili li pilin ante e jan suli tawa ijo suli. “mi jo e kasi loje. mi telo e ona. mi jo e nena seli tu wan. mi pona e ona. (mi pona kin e nena seli moli. ken la ona li seli…) mi pona tawa nena mi, tawa kasi mi. sina pona ala tawa sike sina.”

jan mani li open e uta ona li sona ala e toki. jan lawa lili li weka li pilin e ni: "jan suli li jan nasa".