tenpo sike pi nanpa wan

toki pi nanpa wan

toki!

jan seme li sona e lipu lawa pi toki musi pimeja pi jan lili? o toki e mi. mi wile e sona!

pona!

ni li sitelen mi pi nanpa wan. mi sitelen e ni lon kulupu Lajuna (LiveJournal). sina lukin e sitelen ni la sina ken lukin e pakala mi.

tenpo sike 2008 la mi sitelen e ni. tenpo pini ni la mi jan pi kama sona. mi lon ma tomo ante tan ni: mi wile pini e kama sona sewi pi mi. taso, mi lon tomo mi la mi wan taso. ni li tan pi ni: musi mi li jo e pilin ike e wan taso e wile pi jan pona. tenpo ni la mi ken lukin e ni: jan Pusa pi tenpo pini en jan Pusa pi tenpo ni li jan ante.

mi kama sona e toki pona tan ni: toki pona li toki lili. mi wile sona e ni: mi ken ala ken sitelen e pilin mi kepeken nimi mute lili? mi sitelen e musi kepeken toki pona la mi pilin en ni: mi lon poki ala. mi toki kepeken toki pona la mi ken toki pi ni: pimeja en pilin ike en wile en olin. tenpo ni la toki pona li toki pi pilin mi. toki pona li toki pi wan taso mi.

tenpo sike 2015 la kulupu Lajuna li kepeken ala. tomo toki pi toki pona en kulupu Pesupu (Facebook) li kepeken. tenpo ni la kulupu pi toki pona li jo e jan sin mute. mi ken kama jo e ilo pi toki pona kepeken ilo toki mi. jan ante li wile pana sona e toki pona tawa jan ante lon ma ante. taso jan ni li kama tan ma Amelika lete li kama tan ma Elopa. mi wile e ni: ma Asija li kama jo e kalama suli lon kulupu ni kin. ma Asija li pona tawa mi. mi wile e ni: tenpo kama la mi pona tawa ma Asija en ma Pilipina.

musi pi lipu ni li kama tan tenpo sike pi nanpa wan pi mi lon kulupu pi toki pona (tenpo sike 2008 tawa tenpo sike 2009). musi ali li lon lipu ni ala. taso musi pona li lon lipu ni. kin la musi lon kulupu Lajuna li jo e pakala. mi pali e pakala ni. mi pali e ni tan ni:

mi wile pana tawa musi pi toki pona.

jan Pilipina li jo e toki sona ni: “Ang hindi marunong lumingon sa pinangalingan ay hindi makakarating sa paroroonan”. toki sona ni li wile toki e ni: jan li lukin ala e tenpo pini ona la jan li kama suli ala. mi lukin e musi pi tenpo pini pi mi la mi ken kama jan musi pi toki pona. 

pi jan Pusa

                                                                                                                                

pana telo oko lon tenpo pimeja

mi kukin e sewi pi tenpo pimeja

mi pana e telo oko tawa mun

pilin ike li moku e mi

mi wile e jan pona

(nimi ala)

pilin ike li kama tawa mi

mi moku la mi taso

mi lape la mi taso

mi toki tawa jan ala

mi lukin e jan ante

mi wile e jan pona

pimeja li jan pona mi wan taso

mi wan taso li lon

kon mi

kon mi si seli

pilin mi li pakala

ala li awen

jan pona mi

jan pona mi o,

sina pona tawa mi

sina lon seme?

lukin

mi tawa la mi lukin e jan ante

mi lukin e lawa la mi lukin e jan pona

mi lukin e ona la mi wile toki

mi lukin e ona la pilin mi li pakala

jan ante li pilin e ni: mi wan taso

mi wan taso li lon la mi toki tawa mi

mi lukin e pimeja li pana e telo oko

taso jan pona mi li lon ala poka mi

toki pona li seme?

toki pona li seme? ni li toki sin. ona li jo e nimi lili. taso jan

li pilin e ni: nimi lili li ike pali. tenpo ni la jan pi kulupu pi

toki pona lon lipu Jaku (Yahoo) en kulupu Lajuna (LJ) li

toki ike tawa toki pona tan seme? mi pilin e ni: toki pona

li toki pona. jan ante li jo e pilin ike la ona mute li wile (li

ken) kama sona e toki ante anu pali e toki sin.

jan pi ilo kalama pi tomo nasin sewi

ona li pana e kalama

lon tomo palisa pi ilo kalama kiwen

mi mute li ken kute e kalama pona

jan lili li kama e ni

luka pi jan lili li pakala tan seli

moku ona li pan walo taso

tenpo mute li kama la pilin ike li kama

tenpo lape li kama la pilin ike li kama

tenpo suno ali la ona li pana e kalama pona

tenpo pimeja ali la ona li lukin e ni: jan li pana tawa ona

mun en suno lili li pilin ike tawa ona

ona li wile e olin lon ma ni

o toki ala tawa mi

o toki ala tawa mi

jan ala li ken sona e mi.

sona pona mi li moli.

la mi pakala e...

mi wile e sina

mi tawa tan pilin ike

pilin ike li ike tawa mi

tan ni: mi wan taso

pakala ni li suli tawa mi

taso mi lukin e sina

la mi pilin pona

mi kama wawa

tan ni: sina lon poka mi

mi wile e ni: tenpo ali la mi ken toki tawa sina

tenpo ali la mi pana e telo oko li lape

taso mi pini e lape mi

la sina li lon poka mi ala